Emile Heskey ayaa sheegay in Mohamed Salah uu suuragal tahay inuu xagaagan u wareego Saudi Pro League.
Salah ayaa dhawaan heshiis cusub la saxiixday Liverpool F.C., kaasoo ku kordhinaya joogitaankiisa Anfield ilaa xagaaga 2027. Si kastaba ha ahaatee, inkastoo heshiiskaas cusub, wararka la xiriira mustaqbalkiisa ayaa weli taagan, gaar ahaan maadaama qaab ciyaareedkiisa xilli ciyaareedkan uu hoos u dhacay.
Warbixin ay baahisay BBC Sport ayaa tilmaantay in Salah uu si isa soo taraysa ugu dhow yahay inuu ka tago Liverpool xagaagan. Arrintan ayaa timid kaddib markii uu horay u sheegay in isaga iyo tababaraha cusub ee kooxda aysan lahayn xiriir dhow, isla markaana uu dareemayo in kooxda aysan si buuxda u garab istaagin.
Heskey, oo la hadlayay OLBG, ayaa aaminsan in u wareegista Sacuudiga ay noqon karto tallaabo macquul ah oo ku habboon xiddiga reer Masar, kaasoo hadda ah ciyaaryahanka ugu mushaharka badan Liverpool.
Wuxuu sheegay in inkastoo kooxo waaweyn sida Barcelona, Real Madrid ama Bayern Munich ay yihiin meel uu ciyaaryahan kasta ku hamiyo, mararka qaar ciyaaryahanku uu qaato fursadda ugu macquulsan ee hortiisa taalla.
Heskey ayaa sidoo kale xusay in ciyaartoy waaweyn sida Cristiano Ronaldo, Ivan Toney iyo Sadio Mané ay weli si heer sare ah uga ciyaarayaan horyaalka Sacuudiga, taasoo muujinaysa in ciyaaryahan weli wax soo saar sameyn kara uu halkaas ka sii wadan karo guulihiisa.
Ugu dambeyn, Heskey wuxuu carrabka ku adkeeyay in go’aanka ugu dambeeya uu ku xiran yahay waxa Salah uu u arko inay dan u tahay mustaqbalkiisa, isagoo intaa ku daray in taageerayaashu ay tahay inay ixtiraamaan oo aqbalaan go’aanka uu qaato, maadaama uu wax badan u qabtay Liverpool muddadii uu joogay